No que constitúe un hito sen precedentes, un camariñán xogará no Atlético de Madrid. Será a partires da vindeira tempada e, man a man ca súa némesis todopoderosa, loitará por tódolos títulos: difícilmente pode acadarse maior excelencia para un deportista profesional.  E así este mércores 19 de xuño de 2013, este rapaz da Avenida Eugenio López era presentado nas instalacións oficiais do club colchoneiro xunto a dúas das súas novas fichaxes: o pívot Alberto Val e o porteiro Iñaki Malumbres. Un acto glosado por toda a prensa nacional, dende xornais deportivos ata radios de ámbito estatal, pasando polas cadeas de televisión. Fruto da intelixencia, saber estar e humildade que caracterizaron unha carreira que agora da o salto ata o máis alto da súa profesión, nesta ocasión Víctor non se amilanaba pola expectación xerada e pronunciaba unhas prudentes e sabias palabras, tal e como recollía o diario As: "El Barça está completando una gran plantilla, pero si al final la Liga es cosa de dos, puede que se decida en dos partidos, en dos finales, y ahí no hay favoritos".

Aos nomes lexendarios de Cecilio Alonso, Lorenzo Rico, Juan Francisco Muñoz Melo, Papitu ou Alberto Urdiales, o Club Atlético de Madrid acaba de sumar en datas recentes o do camariñán Víctor Vigo. Despois dunha tempada sinxelamente excepcional ás ordes de Mariano Ortega no Balonmán Zaragoza, esta mesma semana confirmábase a fichaxe deste bravo central polo histórico conxunto madrileño. Un paso máis nunha exitosa carreira que dou os seus primeiros pasos na Escola Municipal de Balonmán, para despois pasar por clubs como o Alcobendas, o Teucro de Pontevedra, Naturhouse de Logroño, Antequera, BM Zaragoza e a partires da vindeira tempada o Atlético de Madrid. Alí voltará a atoparse ao seu compañeiro no conxunto aragonés Alex Dujshebaev, fillo do mítico xugador de orixe kirguiz, unha auténtica lenda viva, Talant Dujshebaev, adestrador precisamente do conxunto colchoneiro.

Novo movemento na carreira profesional do balonmanista camariñán Víctor Vigo. Despois de cuaxar unha máis que meritoria campaña no club da Liga Asobal Antequera, todo parece indicar que para a vindeira tempada Víctor militará nas filas do CAI Aragón, clube que xa se interesara polo central a tempada pasada cando Víctor abandonou un Naturhouse Logroño no que xogou dous formidables anos que remataron ca clasificación dos rioxanos para competición europea por primeira vez na súa historia. Nembargantes a opción elexida polo camariñán o verán pasado finalmente foi a do Antequera, clube dirixido por Antonio Carlos Ortega, no que acabou recalando e no que é peza clave, pero que arrastra uns importantísimos problemas económicos despois de non ser renovado o contrato co patrocinador, feito polo cal aos xogadores non lles puido ser abonadas unha parte das nóminas atrasadas ata datas recentes.

Da man dun Víctor Vigo estelar este fin de semana no derbi galego fronte ao Octavio Pilotes Posada o Teucro asegurouse matemáticamente a permanencia na liga ASOBAL a falta de tres xornadas para o final. O xogador camariñán foi determinante na dirección do seu equipo para lograr unha victoria que os coloca na décima posición a dous puntos do oitavo posto que ocupa agora o Torrevieja, rival na vindeira xornada. Ademais conqueriu o seu gol 100 da tempada consolidándose no top ten dos goleadores nacionais da liga por diante de figuras consagradas como Raúl Entrerríos ou Juanín García, e sendo ademais o máximo goleador nacional do Teucro. Pulsa na foto para ver as estadísticas dun crack do balonmán español.

Camarinas.eu móstrase especialmente orgullosa de poder mostrar a todos os seus lectores o novo integrante do club máis exclusivo de Camariñas, o TOP, nunha das entrevistas máis longamente anheladas por esta redacción: a de Víctor Vigo, o camariñán que arrasa na Liga Asobal, a mellor do mundo, que máis lonxe chegou no mundo do deporte de élite nun pobo que conta con bos exemplos de superclases do deporte, e senón ahí están os casos de Camuel e Juanillo no fútbol profesional. Dotado dun físico excepcional para a práctica do deporte (1,86 cm de altura), e dun talento innato para a práctica do balonmán, Víctor Vigo Gerpe é a perfecta mostra de que con traballo e sacrificio, a base de humildade e decisións intelixentes, sempre seguindo os acertados consellos dos maiores, pódese chegar lonxe naquelo que máis lle gusta a un. Nacido en 1984, un nove de maio, día no que se celebra en Rusia a gran Victoria do Pobo Soviético sobre a Alemania nazi que puxo fin a Segunda Guerra Mundial, viña polo tanto a este mundo cos mellores augurios e non tardou moito tempo en empezar a demostralo. Así, en 1996, con doce anos ingresa na Escola de Balonmán de Camariñas, e con dezaseis debuta cos grandes en 2ª División Nacional. Aínda xogando na Vila dos Encaixes, vive un dos seus mellores momentos cando é convocado para xogar na Selección Española Xuvenil.

Víctor Vigo arrasa na mellor liga do mundo

Nun partido amistoso entre o Teucro contra o Oar en Camariñas

Un dos máximos goleadores da liga ASOBAL de balonmán (a primeira liga do mundo) é un rapaz da nosa vila. Un auténtico exemplo de persoa e de deportista: Víctor  Vigo, o candidato total a "Top Camariñas". O camariñán está a facer a temporada da súa vida sendo o millor  xogador do seu equipo, o Teucro de Pontevedra, cuns números de vértigo: Víctor é o máximo goleador do conxunto pontevedrés.

Ademáis, Víctor é o cuarto máximo goleador nacional da liga de balonmán e o decimosexto goleador do total dos xogadores, por diante de superestrelas como Juanín García, Albert Rocas, Roberto García Parrondo e Alberto Entreríos. Todos eles internacionais absolutos coa Selección Española de Balonmán, Campeona do Mundo e Subcampeona de Europa. Por si fora pouco o rapaz da querida e coñecida familia Vigo Gerpe de Camariñas, é unha persoa sinxela e normal, que cando ten un minutiño libre, aparece por Camariñas sempre acompañado dos seus amigos de toda a vida. Desde camarinas.eu dámoslle a noraboa a Víctor por esta magnífica traxectoria que está a levar con moito traballo e sacrificio. Dentro desta noticia podes ver a clasificación de goleadores da liga ASOBAL de Balonmán.

Espectacular Víctor Vigo

Víctor Vigo antes de marchar de Camariñas xa foi profeta na súa terra

As cousas non podían ir peor. No Palau de Sports de Granollers presentíase outra derrota (e sería a séptima) do CB Teucro. O adestrador do colista da Liga Asobal, o pontevedrés Víctor "Pillo", xa sentía perigar o seu posto, pero entón mirou para o banquillo e alí, nun rincón, atopou a solución nun xove rapaz de 23 anos chegado do lonxano norte, da Costa da Morte, de Camariñas: Víctor Vigo.