A Arousa para os da Illa. A Illa para o resto dos de Arousa. Un territorio de sete kilómetros cuadrados ubicado no centro mesmo da ría máis fértil de Galicia illado secularmente do continente ata que no ano 1985 se construío a ponte que o une ao resto do mundo. Unha constitución en concello propio ("A Independencia") das últimas de Galicia e acadada tras anos de dura loita frente á súa antiga metrópoli, Vilanova de Arousa, e celebrada aínda a día de hoxe como festa nacional. Unhas xentes que despois de anos nos que unha liña regular de ferries marítimos era a única vía de conexión forxaron un carácter distinto, isleño levado ao extremo. Un verxel para o visitante e un lugar digno de visitar. A ruta sureña de camarinas.eu chega ata a Illa de Arousa, a maior ínsula da xeografía galega.

Unha vez saídos de Vilanova enfilamos a kilométrica Ponte de Arousa e Bénder asómase como sempre ás ventanas traseiras do automóvil xermano e contempla anguriado o que parece unha viaxe voadora sobre unhas augas que non acaban nunca: dous longos kilómetros de ponte que en datas recentes foron os causantes do enésimo conflicto diplomático entre a ex-colonia (A Illa) e a antiga metrópoli (Vilanova). Esta última por supostos problemas económicos negouse a instalar alumeado público na parte da ponte que lle corresponde, dende o entendemento de que non procede poñer unha ponte de plata ao visitante que queira abandoar o concello con destino ao seu independizado veciño. No camiño das últimas horas da tarde ata tres autobuses completamente repletos de xiareiros parten cara Vigo, onde o Celta ás 21:00 horas xogará en Balaídos contra o Granada o partido de ida da promoción de ascenso á Primeira División. Atopámonos na Illa, un territorio onde o Celtismo constitúe unha relixión totalitaria que non admite nin discusións nin cismas.

Guiados por un camariñán emigrado ás terras sureñas tomamos tranquilamente uns refrescos nunha céntrica terraza da Illa cuns indíxenas. Preguntado un deles por un dos seus compatriotas como é que non se desplazou ata Vigo no día de autos responde que "non oh, senón a estas horas estaba que xa non vía nin o día nin a nuite". O extraño acento melódico, cantarín, omnipresente ata no último recuncho das Rías Baixas impregna unha conversación que discurre polos sorpresivos temas autóctonos. Así, pídenlle ao noso cicerone "tabaco continental" xa que a crise económica sería a responsable de que os antigos contrabandistas dos tempos pasados volveran ás andadas e pola Illa circulara unha letal partida de Winston de contrabando de supostas orixes chinas, da que "fumar un pitillo é como si fumaras un cartón enteiro".

Abandoados os nosos amigos ao abrigo da céntrica terraza de "O Con do Moucho", decidimos visitar o pequeno e coqueto Faro de Punta Cabalo. Alí, mentras un cargueiro se abre pesadamente paso entre as bateas seguramente con destino ao xigantesco porto de Vilagarcía, auténtica capital demográfica, económica e política da Ría máis fértil de Galicia, tal vez do mundo, ao divisar o impresionante conxunto de cons que o rodea todo, esas enormes moles pétreas de formas redondeadas e piso liso que inundan a Ría de Arousa, un só lamenta non visitar tais magníficos lugares acompañado dalgunha digna sucesora daquela Harriet Anderson que se perdía co seu novio de clase alta polas costas de Suecia na inolvidable "Un Verano con Mónica". Ao rememorar aquela viaxe nunha pequena lancha a motor de dous xóvenes suecos inmortalizada no celuloide en 1953 por Ingmar Bergman e o baño espido da beleza nórdica nunha das piscinas naturais que o mar formaba en pedras lisas e redondeadas, tan semellantes aos cons sureños, un ramalazo de maldita melancolía, sempre presente, apodérase vagamente do redactor. Mentras Bénder, menos soñador, menos teórico, menos snob que o seu dono, divisa dende o fariño a cara norte do veciño Grove e con dous impoñentes ladridos avisa de que é hora de voltar ao fogar. Quen manda, manda.

IMG_3441

IMG_3442

IMG_3444

IMG_3445

IMG_3446

IMG_3450

IMG_3451

IMG_3452

IMG_3453

IMG_3455

IMG_3456

IMG_3460

IMG_3461

IMG_3462

IMG_3464

IMG_3466

IMG_3468

IMG_3469

IMG_3470

IMG_3474

IMG_3475

IMG_3476

IMG_3477

IMG_3478

IMG_3479

IMG_3484

IMG_3485

IMG_3487

IMG_3488

IMG_3491

IMG_3492

IMG_3493